Profesionais de todo o país reuníronse en Santiago para mellorar a accesibilidade cognitiva nos espazos públicos

FADEMGA Plena inclusión Galicia celebrou o pasado venres a

"Xornada de accesibilidade cognitiva en espazos"

na Escola Galega de Administración Pública

en Santiago de Compostela.

 

O evento reuniu a profesionais, entidades sociais

e representantes de administracións públicas

co obxectivo de sensibilizar e formar

sobre a importancia de crear contornas máis comprensibles

e accesibles para todas as persoas.

 

A xornada contou coa participación de expertas e expertos

chegados desde a Oficina de Accesibilidade Cognitiva

e Lectura Fácil de Estremadura,

o Servizo de Información Accesible de Plena inclusión Región de Murcia

e o Laboratorio de Diversidade e Linguaxe da Universidade de Sevilla.

 

Nas súas intervencións destacaron as boas prácticas

e as iniciativas innovadoras que se están a desenvolver

no ámbito da accesibilidade cognitiva.

 

Durante o acto inaugural, o conselleiro de Cultura

da Xunta de Galicia, José López Campos,

destacou que:

é importante seguir traballando neste eido.

FADEMGA está a facer un traballo extraordinario

e a Xunta agradece este impulso, que para nós é ademáis unha guía.

 

O concelleiro de Urbanismo de Santiago de Compostela, Iago Lestegás,

subliñou durante a súa intervención que:

é fundamental que as nosas cidades sexan accesibles para todas as persoas,

garantindo que todas e todos poidan comprender e orientarse

nos espazos urbanos.

 

O presidente do CERMI Galicia, Ramón Sestayo,

fixo un chamamento para que as Administracións se impliquen

e dixo que: 

O compromiso coas contornas accesibles

non pode quedar só no eido do movemento social.

As administracións públicas teñen que asumir o seu papel

nesta transformación.

 

Con este encontro, FADEMGA Plena inclusión Galicia

reafirma o seu compromiso coa promoción da accesibilidade cognitiva

como ferramenta esencial para a inclusión

e a mellora da calidade de vida das persoas con discapacidade intelectual

ou do desenvolvemento.

Unha actividade que se une ao amplo catálogo de iniciativas

nas que traballa FADEMGA,como por exemplo,

- a adaptación de documentos xurídicos a lectura fácil,

- a sinalización accesible en centros de saúde,

- a formación a profesionais e administracións

- e mesmo a diagnose da accesibilidade de espazos.