Impulsamos dous novos recursos para acompañar a sexualidade das persoas con discapacidade intelectual
Un paso adiante para falar, comprender e vivir a sexualidade con apoio, respecto e liberdade
FADEMGA Plena inclusión Galicia
24-03-2026FADEMGA Plena inclusión Galicia dá un novo paso no seu compromiso co benestar e os dereitos das persoas con discapacidade intelectual coa posta en marcha de dúas convocatorias centradas na atención á sexualidade: un "servizo de asesoría sexolóxica" dispoñible durante todo o ano e o proxecto específico "Mirada sexolóxica", cun prazo de inscrición aberto ata o 10 de abril.
Ambas iniciativas parten dunha idea clara: a sexualidade forma parte da vida de todas as persoas e debe ser abordada desde o respecto, o acompañamento profesional e a garantía de dereitos.
O SERVIZO DE ASESORÍA
O "servizo de asesoría sexolóxica" está dirixido a persoas con discapacidade intelectual e ás súas familias, ofrecendo un espazo seguro, confidencial e accesible onde poder falar con liberdade sobre sentimentos, desexos ou inquedanzas. Este recurso permitirá:
- Resolver dúbidas relacionadas coa sexualidade e as relacións afectivas
- Mellorar o coñecemento sobre o propio corpo e os límites
- Favorecer relacións máis saudables e respectuosas...
As asesorías desenvolveranse en distintos puntos de Galicia, adaptándose ás necesidades de cada persoa, e contan con horarios flexibles.
Ademais, as tres primeiras sesións son gratuítas
O prazo para solicitar este servizo permanece aberto durante todo o ano.
Nas seguintes ligazóns podedes:
- Descargar o cartel e dosier informativo da iniciativa.
A INICIATIVA "MIRADA SEXOLÓXICA"
Xunto a este servizo, FADEMGA lanza tamén o proxecto "Mirada sexolóxica", unha iniciativa de acompañamento intensivo dirixida a entidades que queiran mellorar a abordaxe da sexualidade no seu día a día. Este programa ofrece durante catro meses o apoio directo dunha profesional da sexoloxía, que traballará co equipo da entidade para:
- Detectar e abordar necesidades específicas das persoas usuarias
- Dotar aos equipos de ferramentas prácticas
- Xerar espazos de reflexión e aprendizaxe compartida
A intervención realízase de maneira continuada, adaptándose á realidade da organización e reforzando a capacidade dos equipos para actuar con maior seguridade e criterio.
A convocatoria está dirixida a entidades, preferentemente federadas, e conta cunha praza dispoñible nesta edición.
O prazo para presentar solicitudes remata o 10 de abril.
Nas seguintes ligazóns podedes:
- Enviar o voso interese de participación.
- Descargar o cartel e dosier informativo da iniciativa.
UN COMPROMISO COA SEXUALIDADE COMO DEREITO
Con estas dúas iniciativas, a federación reforza a súa aposta por incorporar unha mirada sexolóxica nas intervencións, entendendo a sexualidade como unha dimensión clave da calidade de vida.
Porque falar de sexualidade non é un tema incómodo: é unha cuestión de dereitos, de benestar e, tamén, de acompañamento profesional de calidade.
