Xa temos relatos gañadores do 4º Certame de relato curto
O Certame recoñece o talento literario e pon en valor a lectura e a creatividade como ferramentas de inclusión
FADEMGA Plena inclusión Galicia
16-05-2026FADEMGA Plena inclusión Galicia xa ten relatos gañadores do seu 4º Certame de relato curto, unha iniciativa coa que a Federación quere seguir dando visibilidade ao talento, á imaxinación e á capacidade creativa das persoas con discapacidade intelectual ou do desenvolvemento.
Nesta cuarta edición, os relatos xiraban arredor da lectura ou do Día das Letras Galegas, dúas portas abertas á participación, á cultura e á expresión persoal.
O certame contou con dúas categorías: unha individual e outra grupal, dirixida a relatos elaborados por un máximo de catro persoas.
Na CATEGORÍA INDIVIDUAL, o primeiro premio foi para o relato “O pequeno navegante”, de Rita Ribeiro Durán, da entidade Aspavi.
O segundo premio recaeu en “Casa dos soños”, de David Blanco Pumar, tamén de Aspavi.
Pola súa banda, o accésit foi para “Descubrindo a lectura fácil”, de Manuel Carballo Benito, de FADEMGA Plena inclusión Galicia.
Na CATEGORÍA GRUPAL, o primeiro e único premio foi para “Onde viven os soños”, presentado polo Clube de Lectura Sanxe.
Dende FADEMGA queremos trasladar os nosos parabéns a todas as persoas gañadoras e agradecer a participación de todas as autoras e autores que se animaron a formar parte desta nova edición.
Cada relato presentado é unha mostra de que a literatura tamén é un espazo de inclusión, de liberdade e de recoñecemento.
Este certame consolídase así como unha pequena gran cita coa creatividade, na que as voces das persoas con discapacidade intelectual ou do desenvolvemento contan, emocionan e fan medrar a cultura compartida.
Parabéns ás persoas gañadoras e grazas por encher este certame de historias, soños e palabras con luz propia!
