Súmate ao proxecto “Navega o teu futuro” para mellorar as competencias dixitais das persoas con discapacidade intelectual
Un programa estatal que aposta pola formación dixital como ferramenta de inclusión
FADEMGA Plena inclusión Galicia
05-11-2025Co obxectivo de avanzar na autonomía e inclusión dixital das persoas con discapacidade intelectual ou do desenvolvemento, animámoste a participar no proxecto estatal “Navega o teu futuro: Competencias dixitais para a vida 2025–2026”, impulsado pola Confederación Plena inclusión España.
Formación adaptada e práctica
O proxecto está dirixido a persoas adultas que xa remataron a etapa educativa ou o período de transición á vida adulta, e quere dar resposta á necesidade de seguir aprendendo nun mundo cada vez máis dixital. A formación estrutúrase en dúas fases:
Fase 1: Formación online para profesionais das entidades, que se desenvolverá entre decembro de 2025 e xuño de 2026. Estas sesións dotarán ao persoal de materiais e orientacións para formar posteriormente ás persoas con discapacidade.
Fase 2: Formación presencial dirixida ás persoas con discapacidade intelectual ou do desenvolvemento, a cargo dos profesionais previamente formados.
As sesións tratarán temas tan importantes como o uso de WhatsApp e videochamadas, redes sociais, seguridade dixital, intelixencia artificial ou o uso práctico de ferramentas como Google Maps ou YouTube.
Calendario e metodoloxía
O calendario inclúe unha primeira sesión de coordinación o 11 de decembro, e a primeira sesión formativa para profesionais será o 15 de xaneiro.
Cada mes haberá unha nova temática e, paralelamente, os profesionais organizarán sesións prácticas coas persoas participantes.
A metodoloxía en cascada garante que o coñecemento se adapte á realidade de cada entidade e se manteña ao longo do tempo.
Ademais, as formacións estarán conducidas por unha persoa experta e outra formadora con discapacidade intelectual.
Inscricións abertas
As entidades interesadas poden inscribirse ata o 7 de novembro a través deste formulario.
Para participar, é necesario contar cunha persoa profesional con acceso a internet e compromiso de formar a un grupo estable de persoas da entidade.
Este proxecto é unha oportunidade para seguir apostando pola inclusión tamén no ámbito dixital.
En FADEMGA, cremos no poder da tecnoloxía cando vai da man da accesibilidade e da aprendizaxe compartida!
