Nova pilotaxe sobre acompañamento ao final da vida
Un proxecto dirixido a entidades que traballen con persoas con discapacidade intelectual ou do desenvolvemento maiores de 45 anos.
FADEMGA Plena inclusión Galicia
15-01-2026FADEMGA Plena inclusión Galicia lanza en 2026 unha nova pilotaxe no marco do programa "Maiores en acción". Leva por título “Acompañamento ata o final da vida” e está dirixida a entidades que traballan con persoas con discapacidade intelectual ou do desenvolvemento maiores de 45 anos.
Esta iniciativa nace coa intención de dar resposta á crecente demanda de coñecemento e formación por parte de profesionais e familias que desexan acompañar os procesos de final de vida desde un enfoque ético, baseado no respecto, a dignidade e o afecto.
OBXECTIVOS E CONTIDOS
A pilotaxe ten como obxectivo principal coñecer e compartir estratexias de acompañamento ético e respectuoso nas etapas finais da vida das persoas con discapacidade intelectual.
Entre os temas que se abordarán destacan:
- Que entendemos por final da vida.
- Planificación persoal por adiantado.
- Coidados paliativos e de longa duración.
- Apoio ao proceso de duelo.
- Espiritualidade e memoria.
- Coidar a quen coida.
- Aspectos legais vinculados ao final da vida.
METODOLOXÍA
O proceso desenvolverase mediante sesións formativas mensuais en liña e un espazo virtual compartido onde se colgarán materiais e tarefas.
As entidades participantes contarán co acompañamento de persoas expertas en transformación, como Cristina Roncero e Mireya Gómez, e deberán aplicar na práctica os coñecementos adquiridos.
As sesións celebraranse entre febreiro e novembro de 2026, en horario de 10:00 a 11:30.
A QUEN VAI DIRIXIDA?
Esta pilotaxe está pensada para entidades comprometidas co acompañamento ao final da vida. Cada entidade deberá conformar un grupo formado por:
- Polo menos 1 familiar.
- 1 persoa técnica responsable de centro ou servizo.
- Polo menos 2 profesionais de apoio directo.
INSCRICIÓN E PRAZOS
As entidades interesadas deben enviar a súa solicitude antes do 30 de xaneiro a través do correo electrónico: areasocial@fademga.org
Unha vez pechado o prazo, FADEMGA confirmará as entidades seleccionadas.
No caso de que haxa máis solicitudes das que se poidan asumir, a selección será realizada pola Xunta Directiva da Federación.
DOCUMENTOS E LIGAZÓNS
- Información xeral da pilotaxe.
Para resolver calquera dúbida, podedes contactar con FADEMGA a través do correo areasocial@fademga.org ou chamando ao teléfono 981 51 96 50, preguntando por Ángela Rivera González.
