FADEMGA leva á Fiscalía Xeral do Estado a experiencia galega en accesibilidade cognitiva na xustiza

FADEMGA Plena inclusión Galicia

13-03-2026

FADEMGA Plena inclusión Galicia participou onte na xornada de diálogo “Xustiza fácil de entender”, celebrada na sede da Fiscalía Xeral do Estado, en Madrid.

A federación compartiu a súa experiencia para avanzar cara a unha xustiza máis accesible para todas as persoas, especialmente para aquelas con discapacidade intelectual, nun encontro que reuniu a institucións públicas e organizacións sociais comprometidas coa accesibilidade cognitiva. O acto estivo inaugurado pola Fiscal Xeral do Estado, Teresa Peramato e contou asemade con Jesús Martín, director do Real Padroado sobre Discapacidade e Verónica Ollé, directora xeral para a Eficiencia do Servizo Público de Xustiza do Ministerio de Xustiza, entre outros.

A xornada incluíu diferentes espazos de reflexión e intercambio de experiencias arredor da necesidade de facer máis comprensible o funcionamento da xustiza e a información xurídica. No bloque dedicado a “experiencias de accesibilidade e xustiza en primeira persoa”, à federación presetou o traballo que desenvolve dende hai anos para promover unha comunicación xurídica clara e adaptada.

Nesta sesión participaron Pilar Bernárdez, formadora de acceso á xustiza, e Manuel Seoane, profesional de FADEMGA, quen explicaron iniciativas e prácticas que buscan facilitar que as persoas con discapacidade intelectual comprendan mellor os seus dereitos, os procedementos xudiciais e a información legal que lles afecta. Durante a súa intervención puxeron o foco na importancia de adaptar documentos, linguaxe e procesos para garantir que todas as persoas poidan acceder á xustiza en igualdade de condicións.

Neste sentido, destacaron o papel da accesibilidade cognitiva como ferramenta clave para reducir barreiras e reforzar a autonomía das persoas con discapacidade intelectual. O diálogo contou tamén coa participación de profesionais e representantes de entidades como Plena inclusión e o Centro Español de Accesibilidad Cognitiva (CEACOG), que traballan no impulso de políticas e ferramentas que favorezan unha comunicación máis accesible no ámbito xudicial.

A presenza de FADEMGA Plena inclusión Galicia neste foro pon de relevo o papel das organizacións sociais no impulso de cambios estruturais que permitan avanzar cara a unha xustiza máis inclusiva. O intercambio de experiencias entre administracións públicas e sociedade civil contribúe a identificar boas prácticas e a promover iniciativas que melloren o acceso aos dereitos.

A pesar dos avances realizados nos últimos anos, as persoas participantes coincidiron en que aínda quedan retos importantes por abordar. Con todo, encontros como este evidencian que o traballo conxunto entre institucións e entidades sociais pode favorecer progresos reais.