“Entretempos: unha viaxe creativa pola vida”
A arte como camiño para expresar, comprender e dar sentido á propia historia
FADEMGA Plena inclusión Galicia
02-03-2026No marco do noso compromiso co benestar emocional ao longo de toda a vida, lanzamos “Entretempos: unha viaxe creativa pola vida”, unha proposta de arteterapia dirixida a persoas con discapacidade intelectual e/ou do desenvolvemento maiores de 45 anos.
Esta iniciativa nace da necesidade de crear espazos onde as persoas poidan expresar emocións, pensamentos e vivencias máis alá da linguaxe verbal. Moitas veces, as barreiras comunicativas dificultan elaborar experiencias vitais, transmitir necesidades ou construír un relato propio con sentido. "Entretempos" ofrece unha alternativa accesible, segura e respectuosa.
A arte como linguaxe e como ponte
A arteterapia convértese aquí nun recurso fundamental. A través da creación artística e do simbolismo, as persoas participantes poden:
- Comunicar sen palabras, reducindo a frustración e fortalecendo a autoestima.
- Explorar o pasado, o presente e o futuro de maneira visual e adaptada ás súas capacidades.
- Integrar emocións e experiencias mediante procesos creativos que non requiren habilidades técnicas previas.
- Reforzar a identidade e o sentido vital, elementos clave para o benestar emocional.
Non se trata de “saber debuxar” nin de facer obras perfectas. Trátase de crear para comprender, expresar para integrar e compartir para darlle significado á propia historia.
Un percorrido en catro tempos
Entretempos desenvolverase en catro sesións presenciais, cunha duración aproximada de dúas horas cada unha, combinando propostas artísticas e espazos de conversa libre, acompañada e respectuosa. O itinerario estrutúrase en catro momentos vitais:
Sesión 1: Memoria – O Pasado Explorar momentos significativos da vida e recoñecer as propias raíces.
Sesión 2: Presenza – O Aquí e Agora Conectar co presente e coas emocións actuais.
Sesión 3: Horizonte – O Futuro Proxectar desexos, soños e expectativas.
Sesión 4: Peche do ciclo
Un espazo seguro para ser protagonista da propia historia
O grupo estará formado por entre 10 e 12 persoas e será dinamizado por Lucía González Vicente, arteterapeuta, acompañada por persoal técnico da Federación.
O obxectivo final é ofrecer un espazo no que cada participante poida expresarse ao seu ritmo, atopar significados, fortalecer a súa identidade e sentirse recoñecido ou recoñecida como protagonista da súa vida.
Inscricións, prazos e información
Aquelas entidades interesadas en participar, debedes cubrir este formulario.
O prazo para amosar interese remata o 13 de marzo.
Neste dosier podedes atopar toda a información sobre a actividade.
Se tedes calquera dúbida sobre a actividade, podedes contactarnos chamando ao 981 51 96 50 ou escribindo a areasocial@fademga.org
