O vindeiro 11 de xuño, o Palacio de Congresos e Exposicións de Galicia, en Santiago, acollerá a celebración do 1º Foro de Familias pola Plena inclusión, (e que constituirá o 22 Encontro de Familias). Trátase dun foro aberto á participación onde este ano o tema protagonista será o Relevo Xeracional na Familia e a Plena inclusión. Os asistentes poderán expoñer os temas, ao redor dos cales debatiremos e reflexionaremos buscando liñas de acción para levar a cabo. Un espazo para reflexionar e pensar sobre o relevo xeracional dende o punto de vista dos irmáns, así como sobre as crenzas e visións que temos sobre a inclusión.

O Relevo Xeracional, nos coidados e apoios á persoa con discapacidade, é unha das principais preocupacións nas familias. Para os pais, porque non queren que sexa “unha carga” para os demais fillos. Para os irmáns, porque é unha responsabilidade importante e teñen medo de “non estar a altura” Que podemos facer para que deixe de ser unha preocupación? Imos escoitar algunha das conclusións ás que chegaron os irmáns e que queren compartir cos pais.

Por outra banda, unha das novidades deste ano foi o cambio de nome da nosa organización a Plena inclusión. Unha reivindicación das persoas con discapacidade e das familias que por fin tivo resposta, xa que no antigo nome as letras “PS” de FEAPS significaban “pro subnormais”. Co novo nome damos un paso adiante comunicando unha mensaxe moi clara a sociedade, pero....

Sabemos o que significa e supón? Cremos na Plena inclusión? Estamos dispostos a asumir as súas implicacións?

Se estás interesado en participar, podes descargar tódala información sobre a xornada así como a ficha de inscrición no seguinte enlace: 1º Foro de Familias.

Como preparar a miña participación?

A continuación, facilitámosche 2 fichas que podes cubrir individualmente ou con outros familiares, e que nos axudará á posta en común dos temas: Fichas de participación