502 persoas con discapacidade intelectual participan nun estudo de emprego personalizado en toda España, das cales 30 son persoas de Galicia que recibirán apoios no marco desta metodoloxía.

O emprego personalizado baséase na creación de novos postos de traballo deseñados pensando na persoa, e en colaboración con empresas. É unha metodoloxía que demostrou probados resultados para todas as persoas, e de forma especial con perfís como o das persoas con dificultades de empregabilidade debido ás súas grandes necesidades de apoio (dificultades para comunicarse ou multidiscapacidade, entre outros).

O proxecto está impulsado polo Ministerio de Inclusión e coordinado por Plena inclusión España e conta con 2 millóns de euros de orzamento dos Fondos de Recuperación e Resiliencia Next Generation. Ademais dos itinerarios e os apoios que recibirán as persoas participantes, o proxecto ten unha parte de investigación, na que participarán 30 galegos e galegas con discapacidade intelectual e cuxas conclusións servirán para mellorar as prácticas de promoción de emprego entre as persoas máis vulnerables.

Así, á súa vez, poderanse facer mellores políticas sociais para o colectivo. No proxecto, a maiores de Galicia, participan 12 comunidades autónomas: Andalucía, Aragón, Asturias, Canarias, Castela e León, Cataluña, Estremadura, A Rioja, Madrid, Rexión de Murcia, Comunidade Valenciana e a cidade autónoma de Ceuta.

Todas as organizacións participantes son parte do movemento asociativo Plena inclusión, que agrupa a 950 asociacións en todo o Estado que defenden os dereitos de 150.000 persoas con discapacidade intelectual e do desenvolvemento e as súas familias.