Con motivo do Día Internacional dos/as Traballadores/as, o Movemento Asociativo FEAPS, a Asociación para o Emprego (AFEM) e a Asociación Empresarial para a Discapacidade (AEDIS) apostan, máis que nunca, pola discriminación positiva no ámbito laboral das persoas con maior dificultade de empregabilidade, entre as que se atopan aquelas con algunha discapacidade intelectual ou do desenvolvemento. Estas organizacións consideran necesario introducir medidas que favorezan o dereito a un traballo digno e de calidade deste colectivo especialmente vulnerable.

Nos últimos anos, o sector da discapacidade ven soportando unha continua redución dos fondos públicos provintes do orzamento destinado á inserción laboral das persoas con discapacidade. Ademais, no “Novo marco de programación e avaliación das políticas activas de emprego” que propón o Ministerio de Emprego e Seguridade Social (que en definitiva supón unha reforma do actual sistema de financiamento), as persoas con discapacidade non se atopan entre os destinatarios das medidas para colectivos especialmente afectados polo desemprego, que é un dos catro obxectivos prioritarios para 2013. Esta situación crea no sector máis incerteza aínda sobre a garantía dos fondos públicos destinados a financiar os programas de emprego e, por tanto, a creación e mantemento dos postos de traballo. Todo iso únese ademais á práctica desaparición do emprego con apoio, así como das estruturas e profesionais que até agora o facían posible.

Este martes, representantes de Organizacións non Lucrativas Galegas presentamos a Campaña X SOLIDARIO que cada ano leva a cabo o sector social, para concienciar ás persoas contribuíntes sobre a necesidade de marcar o cadro de Fins Sociais na declaración da renda, e contribuír así co 0,7% da súa cota íntegra a programas dirixidos aos colectivos máis desfavorecidos.

No acto de presentación da Campaña X Solidario, coordinada polas principais plataformas galegas que representan ás ONGs, participaron Anxo Queiruga, Presidente do CERMI Galicia, María Paz, Vicepresidenta da Coordinadora de ONGD, Carlos Rosón, Secretario da Rede contra a Pobreza, EAPN-Galicia e dúas persoas que participan en programas financiados con cargo á asignación tributaria do IRPF.

O ano pasado recadáronse en Galicia a través do cadro para Fins Sociais 14,1 millón de euros. Se todos os contribuíntes galegos marcaran o recadro de fins sociais destinados aos proxectos para as persoas máis desfavorecidas a cantidade final ascendería a 26 millóns de euros.

Así se trasladou durante a presentación da campaña “X Solidario 2013” que tivo lugar en Santiago de Compostela.