No documento, FEAPS identifica graves riscos na sustentabilidade dos apoios e servizos ofrecidos polas súas organizacións ás persoas con discapacidade intelectual ou do desenvolvemento; a supervivencia dos seus centros especiais de emprego e de 30.000 de postos de traballo de persoas con discapacidade intelectual ou do desenvolvemento; a cobertura do citado SAAD; a inclusión destas persoas no ámbito da educación; ou o sobreesforzo que terán que facer as súas familias neste novo contexto económico.

Ante todas esas situacións, FEAPS fai un chamamento á unidade do seu movemento asociativo e de toda a cidadanía en xeral, e afirma que os recortes e falta de pagamentos das administracións públicas, así como as novas medidas expostas polo Goberno, supoñen "unha flagrante vulneración de dereitos recoñecidos na Constitución Española e na Convención da ONU sobre dereitos das persoas con discapacidade".

Xunto a iso, o documento afirma que as persoas e organizacións de FEAPS están a esforzarse para que a crise non afecte oas colectivos que representan, e seguir cumprindo "cunha responsabilidade que corresponde en última instancia ao Estado, e que este nos derivou". E afirma: "mentres unha soa persoa con discapacidade intelectual ou do desenvolvemento se atope nunha situación que lle avoque á marxinación ou á pobreza, seguiremos loitando por ela".

Para terminar, o manifesto di que esta reivindicación de FEAPS "é tarefa de todos os cidadáns e cidadás deste país", porque forma parte da procura dunha sociedade máis xusta e solidaria para todos.