A reserva do 2% das prazas nas Ofertas de Emprego Público, supón un importante avance cara á igualdade laboral do colectivo de persoas con discapacidade intelectual.

O pasado 24 de novembro, o Ministerio de Política Territorial e Administracións Públicas fixo público a través do Boletín Oficial do Estado (BOE), a convocatoria específica de oposicións para ingreso como persoal laboral fixo, coa categoría de Axudantes de Xestión e Servizos Comúns en exclusiva para persoas con discapacidade intelectual.
Desde a Oferta de Emprego Público de 2009, a Administración Xeral do Estado vén reservando un 2% do total de prazas convocadas para persoas con discapacidade intelectual.

Convócase o proceso selectivo para cubrir 54 prazas da Categoría de Axudante de Xestión e Servizos Comúns (actividade principal de Ordenanza) polo sistema xeral de acceso libre. Destas 54 prazas, 3 corresponden a Galicia (2 na Coruña e 1 en Lugo)

 

Desde FADEMGA FEAPS GALICIA  (Federación de Asociacións a favor dás Persoas con Discapacidade Intelectual) crearase en colaboración coa Confederación FEAPS unha PLATAFORMA DE FORMACIÓN para coordinar e apoiar a aquelas persoas con discapacidade intelectual que queiran optar a esta convocatoria,  e adaptaranse os contidos precisos para facelos completamente accesibles.  Para poder acceder á devandita plataforma,  deberán contactar coa Federación antes do próximo 2 de decembro.

 

A reserva de prazas específicas destinadas ás persoas con discapacidade intelectual nas ofertas de emprego público, supón un importante paso para a normalización das condicións laborais deste colectivo, un dereito que aparece recollido na Convención da ONU sobre os Dereitos das Persoas con Discapacidade, sendo España o primeiro país do mundo en trasladar o contido deste Convenio á súa Lexislación.

Xunto a este tipo de convocatorias, FADEMGA FEAPS GALICIA, xunto á Confederación FEAPS,  tamén defenden a adopción doutro tipo de medidas, como a adaptación de probas nas convocatorias de oposicións, a través de probas prácticas reais (que se demostre que se posúen os repertorios básicos de coñecemento para a execución dos postos de traballo ofertados), así como a reserva dunha parte da contratación pública aos Centros Especiais de Emprego, o que favorecería a integración destes traballadores.

Actualmente, as Ofertas de Emprego Público contan cunha reserva do 7% das prazas para persoas con discapacidade de maneira que un 2%  das prazas ofertadas resérvanse para persoas que acrediten discapacidade intelectual e o 5 % para calquera outro tipo de discapacidade.