O Presidente da Cámara, José Bono, recriminou en dúas ocasións a Villalobos e pediu que tal alusión non constase en acta, ao considerarse insultante.

23/02/11. Desde Fademga Feaps Galicia (Federación de Asociacións a favor das persoas con discapacidade intelectual) e FEAPS manifestamos o noso asombro pola polémica que se suscitou na Xunta de Portavoces do  Congreso dos Deputados, cando abordaban a necesidade de cumprir coa lei no ámbito da contratación de persoas con discapacidade.

En Fademga Feaps Galicia e FEAPS entendemos que o Congreso dos Deputados e os representantes lexítimos do pobo español, deben ser modelo en relación  coas persoas con discapacidade e as súas necesidades de inclusión social e laboral, promovendo apoios para facer efectiva a  igualdade de oportunidades e  o exercicio dos seus dereitos cidadáns, especialmente cando se refire a persoas con discapacidade intelectual ou do desenvolvemento que se atopan entre os grupos con maiores dificultades de inserción laboral.

Constatamos que as persoas con discapacidade intelectual teñen un déficit no cumprimento dos seus dereitos como cidadáns.  A formación das propias persoas con discapacidade intelectual e a sensibilización social son o camiño para previr os abusos e promover unha vida de calidade para cada persoa como cidadán/a de pleno dereito na sociedade na que vive.